筆者由細到大都係一個好慳家既人，見到鍾意既野都唔會去買，就算買野都會睇下有冇平靚正既二手野，十幾年前個陣咁慳係因為想儲錢去馬丘比丘，另一方面我既家境唔富裕，屋企人由15歳開始就冇再畀零用錢我，對於一個年輕人，要自己儲十幾萬，一啲都唔容易，慢慢培養左好慳既習慣，而慳左咁多年，深明慳錢唔係去超級巿場記曬啲價錢，包米今日平左一蚊就買，而係要訓練一套慳錢既思考模式，大家都可以參考下
需要（NEED） VS 想要（WANT）
老生常談，究竟我地買野係我地想買，定真係需要買，其實我買一樣野之前，我會諗冇左依樣野對我黎講會有幾辛苦呢?對我有幾大影響呢?
同一件物品對於唔同人有唔同既意義，一部相機對於一個攝影師同一個普通人既意義唔同，如果一個攝影師，佢有必要用相機謀生，冇左相機等於冇左生活，而其他人買相機的一刻，都會覺得買部單反好似影得靚啲，放上Instagram會有多啲like，就會因為一時衝動買左，但最後都未必學懂全部功能，就放埋左一邊。
再用買衫為例，究竟我地需要幾多件衫呢？每個人需要出席不同的場合，有不同的需要是可以理解的，例如：一個銷售人員需要見客，需要買多一兩件光鮮衣服，但如果你工作要著制服，一番到公司就換衫，又有冇需要有幾十件衫放衣櫃呢？但最後要幾多件只有你自己先答到。
避免消費力錯覺（Purchasing power illusion)
隨著近年科技進步，大家的生活質素提升，商家亦為普羅大眾提供了更多選擇，基層巿民較容易接觸到高端產物，即使是同類型的日用品或家電，有一樣的功能，但卻會有唔同的等級及價格。
我10個同事9個有買Dyson，你都可能有一兩件Dyson，Dyson 係消費力錯覺的最好例子，佢旗下的產品林林總總，可以睇下下表
| Dyson | 其他牌子 | |
| 風筒 | 3380 | 295 |
| 吸塵機 | 5180 | 700 |
| 風扇 | 2680 | 499 |
| 空氣清新機 | 3280 | 999 |
| Total | 14520 | 2493 |
如果你有曬上面4樣的Dyson 產品，你總共用多左約12000蚊，當然，如果你搵廿萬一個月，12000蚊對你黎講唔算係啲咩，你番一日工就搵到，但現實係好多搵4,5萬甚至1,2萬一個月都會買。
要避免出現以上情況，可以用目的角度去思考，用最簡單最直接既方法去解決問題。
如果要買一個風筒，目的係吹乾個頭，唔係畀人睇我用dyson 風筒吹乾個頭，咁究竟$3380一個風筒同$295一個風筒有咩分別呢？
再舉一個例子，如果上班路途遙遠，需要買車代步，究竟應該買corolla 定買寶馬？再回想一下，你當初想買車的時候是想節省時間做更多有用的事，咁三萬蚊一架二手舊車跟三十萬一架全新車，用途根本一樣，如果你先思考目的跟要解決的問題，就可以更易搵到一個簡單又便宜的方法。
時間是最重要的金錢
財務自由的路上，我們希望用最短的時間達至財務自由，用現時的努力換來未來的自由時間，時間不單是你最重要的朋友，同樣是用作計算的單位。
在每一次要考慮重大支出時，都會用時間代替金錢去考慮，假設我現時收入大概為2000蚊日薪，如果我要買一樣2000蚊的產品，我要用一日既工作去換取，如果我用上面Dyson的例子，就要用多我一星期的工作時間，我買之前會諗，如果我唔買Dyson，我便可以早一星期退休，坐喺沙灘到chill，從而減少自己的購買意慾。
近期，我需要考慮養不養車的問題，有錢人都會話用錢去買時間，而車就係最好既例子，筆者計曬牌費，保險，停車場，油費，毎個月大概要用5000元左右，亦即是兩天半的工時，但到底我換到幾多時間呢？每天上班大概省下1小時，1×22（工作天）=22小時≈2天半工作。
基於以上的計算，養車看似合乎成本，但其實用時間計算支出有一個盲點，就是你現時的金錢，在未來會帶來投資收益，今天的一蚊，可能係五年後的兩蚊，當然有人會認為換黎既時間可以增值自己令自己將來的收入更高，筆者好同意咁做，但唔一定要用金錢黎換，坐交通工具的時間，有個司機幫你揸車，你可以靜靜地睇下書，都可以增值自己，筆者依篇分享就係坐車的時候打的，儘量碎分化時間，令自己可以做到更多事情。
減少被動支出(恒常支出)
要達到財務自由，收入跟支出同樣重要，經常聽人講被動收入，但你有冇聽過被動支出呢？被動支出的意思是你不論有冇使用該服務，而每個月都繳付的費用，很多時你不經不覺就己經每個月付費，每樣支出都可以應付到，但加起來就蠶食左你人工的一大部分，可以試下好似下表咁列出黎睇下，我用一般香港人的消費計一計數
| 有錢人(每月支出) | 窮人(每月支出) | |
| 電話費 | 250 | 150 |
| Netflix | 63 | 0 |
| Apple music | 150 | 0 |
| Youtube premium | 68 | 0 |
| 健身房 | 500 | 0 |
| 養車 | 5000 | 0 |
| Total | 6031 | 150 |
財務自由講求收支平衡，用越多的被動支出就要越多的被動收入去支持，被動收入要有資產的概念，如果以簡單的資產收租收息概念，一般會有３—４％的回報，以上面為例子，如果你一個月用大概$6000，一年$72000，大概你需要有$1800000（72000/0.04）等值的資產去支持你，相反筆者每月只用$150電話費，大概需要$37500（1500/0.04）的資產。我冇付費用APPLE MUSIC,YOUTUBE PREMIUM,健身房唔等於我冇聽歌,冇睇YOUTUBE,冇健身，其實只要你願意你會發現有更多選擇，例如:聽歌有免費軟體，Youtube 唔洗PREMIUM都可以睇到，健身可以做街頭健身，所以話財務自由係一種選擇，上面幾個簡單的選擇可以令你儲少近$170萬就可以退休，你又會點去選擇?